ប្រកាសអាសន្ន
សេចក្តីជូនដំណឹង

 

ថ្ងៃអង្គារ ៤កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១១ ខែធ្នូ ឆ្នាំ ២០១៨ នាយកដ្ឋានឧតុនិយម (DOM) បានជួបប្រជុំជាមួយគណៈប្រតិភូមកពីរដ្ឋបាលឧតុនិយមកូរ៉េ (KMA) និងវិទ្យាស្ថានឧតុនិយមកូរ៉េ (KMI) ដើម្បីពិភាក្សាអំពីនិតិវិធីក្នុងការអនុវត្តគម្រោងជំនួយឥតសំណង ស្តីពី ការដំឡើងស្ថានីយឧតុនិយមស្វ័យប្រវត្តិ AWS ថ្មី ចំនួន ២៥ កន្លែង ជាមួយនិងគ្រឿងបរិក្ខារ ដែលនឹងអនុវត្តចាប់ពីឆ្នាំ២០១៩ ។

ក្នុងកិច្ចពិភាក្សា ភាគីទាំងពីរបានកំណត់ទីតាំងជាអាទិភាព និងជាក់លាក់ ធានាដល់ការទទួលបានទិន្នន័យឧតុនិយមពីស្ថានីយ៍ទាំងនោះ សម្រាប់ប្រើប្រាស់ក្នុងការបង្កើនប្រសិទ្ធភាពក្នុងការតាមដាន និងព្យាករណ៍អាកាសធាតុ ។ ជាមួយគ្នានោះ ក៏បានជជែកដោយធ្វើយ៉ាងណាឲ្យស្ថានីយឧតុនិយមស្វ័យប្រវត្តិ ដែលបានដំឡើងនោះ ដំណើរបានសុក្រិត និងយូរអង្វែង ។

នៅក្នុងគម្រោងនេះដែរ បានដាក់បញ្ចូលការបណ្តុះបណ្តាលទូលំទូលាយមួយ ដែលនាយកដ្ឋានឧតុនិយម ទាំងការពង្រឹងសមត្ថភាពមន្ត្រីព្យាករណ៍ ជាពិសេសមន្ត្រីបច្ចេកទេសឲ្យមានសមត្ថភាព ចេះគ្រប់គ្រងថែទាំ និងជួសជុលឧបករណ៍ឧតុនិយមស្វ័យប្រវត្តិ ដែលបានដំឡើងនោះដោយផ្ទាល់នៅកម្ពុជា និងនៅសាធារណៈរដ្ឋកូរ៉េ ។

ភាគីទាំងពីរបន្តអនុវត្តនូវនិតិវិធីនានា ដើម្បីឲ្យការអនុវត្តគម្រោងប្រព្រឹត្តទៅសម្រេចបានជោគជ័យតាមការគ្រោងទុក ៕